ريفيو لآلة القهوة من Dolce Gusto ..

السلام عليكم ورحمة الله وبركاته..


موضوع اليوم حيكون عن ماكينة القهوة (Dolce Gusto) 
اول شيء بقولكم من فين اخذتها وليه اخذتها من هالموقع بالذات
فالبداية احترت من فين اخذها وبحثت فالمواقع ف لقيت ان هالموقع مناسب جدا لي Computeruniverse
فكرت اخذها من امازون بس بطلت عارفين ليه ؟ مو عارفين طيب انا اقولكم ليه
عشان الشحن حيكون مرا غالي طبعا حيكون بالوزن وهالشيء بيكلفني كثير لانها ثقيله
ثاني شيء لان امازون امريكي وحتكون الاله 110 مو 220 وهالشيء يخليها بطيئه والكوفي ما حيكون حار ( يكون دافيء)
ف هالنقطتين مهمين جدا بالنسبة لي ف عشان كذا استبعدت امازون واخترت موقع Computeruniverse
احلى شيء بالموقع ان شحنه ثابت اتوقع 120 ريال يعني خذي اللي تبغي وانتي متطمنه
وكمان متوفره كل النكهات تقريبا وسعرها ما يتعدى 25 ريال
اللي حيسألوني ليه ما اخذتها من بنده او اي محل لان كل ما اروح القاها مخلصه وكمان لان سعرها هنا 850 واخذتها من الموقع ب 450 تقريبا يعني مرا تفرق
ذحين بوريكم الاله والنكهات بالتفصيل

هذي عينات جات مع الالة

هذي النكهات

النكهات اللي فوق احلى نكهات حقيقي مرا حبيتها خصوصا الكابتشينو واللاتي 

 هذولا كلهم حلوين اللي فوق كأنه كابتشينو والازرق كابتشينو بارد والاخضر شاي مغربي جيد

 مو مرا حبيت هذي النكهات لانها اسبريسو وثقيله مرا وطعمها مر 

نفس الشيء مرا ثقيله ما حبيتها 

هذي اكثر نكهات حبيتها

كل علبه تجي فيها 16 كبسولة لكن بعض النكهات فيها حليب ف حتجيكم 8 النكهة نفسها و8 حليب 
هذا شكل الكبسولات 

اللي حابه تشتري الالة انصحها تاخذ الاوتوماتيك لانها هي تحدد كمية المويا اما النوع الثاني انتي تحددي فيه كمية المويا ف هذي شغله صعبه ممكن تكثري المويا ويجي خفيف وممكن تقللي ويجي ثقيل ف ريحي راسك وخذي الاوتوماتيك لانها اسهل واحسن.
كل كبسولة مكتوب عليها كمية المويا اللي تحتاجيها وبناء عليها تسوي الكوفي..

هذا كابتشينو (طبعا معاه كبسولة حليب)

ان شاء الله الموضوع عجبكم واستفدتوا واشوفكم فالمواضيع الجايه..